Almaniya Ukrayinağa 2029 senesine qadar 11 milliard yevro arbiy yardım berecek, dep bildirdi Brükselde "Ramştayn" formatındaki Kontakt gruppasınıñ toplaşuvında iştirak etken Ukrayina mudafaa naziri Rustem Ümerov.
"Almaniyanıñ halqına ve ükümetine, hususan zenaatdaşım nazir Pistoriusqa, Ukrayinağa 2029 senesine qadar 11 milliard yevro arbiy yardım ayırılmasını ilân etkeni içün minnetdarım. 2025 senesi Almaniya yeminlevi kökümizni qorumağa yardım etecek (raketalar ile IRIS-T sistemaları, Patriot raketaları) ve cenk alanında mevzilerimizni pekitecek (Marder, Leopard, top sistemaları)", — dep yazdı nazir X içtimaiy ağında.
"Ramştayn" formatında nevbetteki toplaşuv arfesinde prezident Volodımır Zelenskıy, Ukrayinanıñ ava mudafaası boyunca ortaqlarınen "bazı añlaşmaları" bar, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
