Rusiye Mudafaa nazirligi aprelniñ 28-nde Ukrayına şeerlerine qarşı darbeleriniñ maqsadı olaraq «Ukrayına Silâlı quvetleri yedekleriniñ bulunuv yerlerini» ayttı. Ücüm neticesinde eñ az 20 barışıqsever sakin elâk oldı.
«Rusiye arbiy-kosmik quvetleri Ukrayına Silâlı quvetleriniñ yedek noqtalarına raketa darbelerini endirdi, maqsadqa irişildi, olarnıñ uruş alanlarına çıqması toqtatıldı», – dep bildire müessise beyanatını Rusiye devlet haber agentlikleri.
Aprelniñ 28-nde saba erte Rusiye ordusı Ukrayınağa ücüm etti. Çerkası vilâyetiniñ Uman şeerinde raketa doquz qatlı binağa ücüm etti. Neticede 20 insan elâk oldı. Adise yerinden kelgen videolarğa köre, evde eñ az bir kiriş yıqıldı.
Dnipro şeerinde raketalar mustaqil evge ücüm etti. Eki insan elâk oldı – eki yaşında qızçıq ve 31 yaşında qadın. Üç kişi yaralandı, dep haber ete Dnipropetrovsk vilâyetiniñ arbiy memuriyeti.
Ukrayına Silâlı quvetleriniñ malümatına köre, ava mudafaa quvetleri 23 qanatlı raketadan 21-sini ve eki dronnı yoq etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
