Ukraina prezidenti Volodımır Zelenskıy Qırımtatar halqınıñ lideri Mustafa Cemilevni doğğan kününen hayırlap, oña qırımtatar halqınıñ aqlarınıñ ğayrıdan tiklenmesi oğrunda sarsılmaz işanç ve yorulmaz küreş nümünesi dedi. Bunıñ aqqında devlet başınıñ Facebook saifesinde yazıla.
"Bugün öz 78-nci doğğan kününi Qırımtatar halqınıñ milliy lideri, Qırımtatar halqı Meclisiniñ birinci reisi Mustafa Cemilev qayd ete. Türkiyeniñ şeerleri ve parkları adını taşığan bu ulu insan ile aynı devirde yaşamaq epimizniñ çastımız bar! Mustafa ağa qırımtatar halqınıñ aqlarınıñ tiklenmesi oğrunda sarsılmaz işanç, cesaret ve yorulmaz küreşniñ nümünesidir", - dep yazıla bildirmede.
Prezident hatırlattı ki, Cemilev sovet ükümeti tarafından basqılarğa oğratıldı ve taqip etildi, lâkin o, qırımtatarlar öz tuvğan toprağına qaytmaq aqnı alğanına qadar küreşini toqtatmadı.
"Ve bugünde, Qırım Rusiyeniñ işğali altında olğanda, qırımtatar halqı öz tuvğan toprağında kendini kene azat ve telükesiz is etip olamağanda, Qırım sakinlerini kene qorqutqanda, taqip etkende, qırsızlağanda ve esassız apis etkende Mustafa Cemilev aqiqiy lider olaraq öz halqına ilham, küç bere ve bu sefer de duşman yutquzacağına ve bizim Qırımımıznı qaytaracağımızğa işançnı pekite", - dep qayd etti devlet başı.
Zelenskıy, "birlikte mıtlaqa ğalebe qazanacağımızda ve Mustafa ağanıñ nevbetteki doğğan künlerinden birini bizim Qırımımızda, Ukraina ve qırımtatar bayraqları altında lezetli qave içip, qayd etecegimizde emin olğanını bildirdi.
"İnanam ki, bu mıtlaqa olacaq. Bugün ise sayğılı Mustafa ağanı doğğan kününen hayırlayım, qaviy sağlıq, ilham, quvet ve ğalebe tileyim!", - dep yekünledi o.
