Bahmut mudafaasını yapqan Ukrayına arbiyleri qarşı ücümge azırlanmağa devam ete – eki aydan soñ başlana bile. Bu aqta Ukrayına prezidentiniñ ofis yolbaşçısınıñ mesleatçısı Mıhaylo Podolâk La Stampa intervyüsında ayttı.
Memurnıñ aytqanına köre, cebede arbiylerniñ semereli areketleri içün uzun mesafeli raketalar ve 155 mm silâ yedekleri kerek.
«Başta rusiyelilerni arıqlatırmız, soñra başqa yerlerge baqarmız. Bizge uzun mesafeli raketalar kerek», – dep qayd etti o.
Podolâk qayd etkenine köre, Bahmut strategik olaraq müim qala. Bu ücüm areketlerine azırlıqnı bitirmege imkân bere.
«155 mm kalibrli ağır top snarâdlarınıñ arttırıluvına ihtiyacımız bar. Aşıqmaymız, kelecek eki ayda teşkil olurmız», – dep qoştı mesleatçı.
NATO baş kâtibi Jens Stoltenberg martnıñ 8-nde Rusiye ordusı büyük ğayıplarğa baqmadan Bahmutnı zapt etüvge yaqın ola bile, dep bildirdi. Onıñ aytqanına köre, «bu cenkniñ deñişüv noqtasını ifade etmey».
Ukrayına prezidenti Volodımır Zelenskıy CNN Amerika neşirine bergen intervyüsında Rusiye Federatsiyasınıñ ordusı Bahmutnı kontrol altına alsa, Ukrayına şarqında müim şeerlerniñ zapt etilüvi içün «yol açıq» olacaq, dep ayttı.
Soñki toplaşuvda memleketniñ arbiy-siyasiy reberligi Bahmutnı imaye etmege devam etecek, dep qarar aldı. Baş ştabnıñ malümatına köre, Ukrayına ordusı şeerdeki mevzilerini tutmağa devam ete.
Bahmut cebeniñ esas sıcaq noqtası olıp qala. Rusiye ordusı 2022 senesi iyül ayından berli, qomşu Lugansk vilâyetiniñ büyük qısmını (Severodonetsk, Rubejne, Lısıçansk) işğal etkende, şeerni zapt etmege tırışa. Yanvar ayında Bahmutqa yaqın mevzilerden Rusiye arbiyleri ve yalçıları faal ücüm başlattı. Arbiy talilciler aman-aman bütünley yoq etilgen Bahmutnıñ zapt etilüvi Rusiye ise timsaliy bir emiyet taşıy, amma strategik ceetten müim degil, dep ayta.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
