Ukrayinanıñ işğal etilgen territoriyalarından daa üç balanı alıp ketmege imkân oldı, dep bildirdi yanvarniñ 7-nde Yuqarı Radanıñ insan aqları vekâletlisi Dmıtro Lubinets ve prezident Ofisiniñ yolbaşçısı Andriy Yermak.
Lubinetsniñ qayd etkenine köre, eki bala Donetsk vilâyetiniñ işğal etilgen qısmında qalğan qardaşlar, anasınıñ Ukrayinadan ketmesi kerek olsa da, olar öz babadınıñ yanında qalğanlar:
"O, öz başına balalarını qaytarıp olamadı, şunıñ içün bizim Ofiske muracaat etti. Oña yardım etip oldıq: balalar işğal etilgen territoriyadan tahliye etildi ve anasına qavuştılar. Bugün bu qoranta beraberdir, telükesizlikte, cenk yaralarını sarıp aluvğa doğru birinci adımlarını atmaqta".
Daa bir çağına yetmegen kişi — işğal etilgen topraqlarda Ukrayinağa qoltutqan 17 yaşındaki yigit.
"Netñcede, o bizge muracaat etti ve şimdi telükesizlikte buluna, gumanitar ve maddiy yardım ala, vesiqalarnı resmiyleştirmege yardım etemiz. Onı yañı ayat basamağı — serbest ve mustaqil Ukrayinada tasil alması bekley", — dep qoştı ombudsmen.
Prezident ofisiniñ malümatına köre, 2024 senesi devamında Ukrayina kontrolindeki topraqlarğa 449 bala qaytarıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
