Ukrayinanıñ yañıdan quruluv planı 750 milliard dollar qıymetlendirile, devletniñ ğayrıdan quruluvınıñ esas menbası Rusiyeniñ musadere olunğan aktivleri olmalıdır, dep Ukrayina baş naziri Denis Şmıgal Luganoda (İsviçre) Ukrayinanıñ yañıdan quruluvı üzre halqara konferentsiyasında çıqışı vaqtında bildirdi.
"Rusiyeniñ ve rus oligarhlarınıñ musadere olunğan aktivleri esas yañıdan quruv menbası olmalıdır, dep tüşünemiz. Bu qanlı cenkni Rusiye akimiyeti başlattı. Bu büyük viranelerge sebep olar oldılar ve bundan mesül de olar olmalılar", - ükümetniñ matbuat hızmeti Şmıgalniñ aytqanlarından alıntı ketire.
Onıñ sözlerine köre, çeşit tahminlerge köre, Rusiyeniñ buzlatılğan aktivleri 300-500 milliard dollar teşkil ete ve bazı memleketler artıq bu aktivlerni musadere etüv esnasını başlattı.
Ukrayinanıñ yañıdan quruluvınıñ diger menbaları halqara maliye teşkilâtlardan ve ortaq memleketlerinden kelgen grantlar ve imtiyazlı kreditler, hususiy sektornıñ yatırımları, hususiy şahıslarnıñ ve şirketlerniñ bücetten tış ücreti ve Ukrayina devlet bücetinden paradır.
Ukrayina prezidenti Volodımır Zelenskıy İsviçreniñ Lugano şeerinde keçirilgen konferentsiyada video çıqışı vaqtında Ukrayinanıñ Milliy yañıdan quruv planını ilân etti.
Onıñ sözlerine köre, Ukrayinağa qarşı keniş mıqyaslı cenkniñ dört ayı içinde Rusiye 2102 tasil müessisesini, 799 tibbiyet infraterkibiniñ öbyektini ve 80 biñge yaqın mesken obyektini yoq etken.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
