Rusiye ile cenk daa devam etse ve Ğarpnıñ yardımı eksilse bile, ukrayınalılarnıñ 60%-ından ziyadesi işğal altındaki Qırımnı cenk yolunen azat etüv ıntıluvına qoltuta. Bu aqta Kyiv halqara içtimaiyat institutı keçirgen sorav neticeleri köstere.
«64%-nıñ fikirince, Ğarp yardımı eksilse ve devamlı cenk telükesi olsa bile, Ukrayına Qırımnen beraber bütün topraqlarını azat etmege tırışmalı. Buña qarşı olaraq, 24% Donbasnen beraber (amma Qırımsız) bütün topraqlarnıñ azat etilüvi yerine Ukrayına Qırımda cenk areketlerinden vazgeçe bile, dep tüşüne», – dep aytıla tedqiqatta.
Kyiv halqara içtimaiyat institutınıñ malümatına köre, umumen vatandaşlarnıñ tek 9%-ı topraqnı bermege azır, ukrayınalılarnıñ 87%-ı ise er angi uzlaşuvğa qarşı çıqa. İçtimaiyatçılar soravda iştirak etkenlerge tek «topraq meselelerinen» bağlı sualler berildi ve «uzlaşuv» teklifleri aqqında aytılmadı, dep qayd ete.
Bilgisayarlı telefon intervyüları vastasınen sorav fevralniñ 22-nde martnıñ 6-na qadar keçirildi. İştirak etkenler aqqında mında malümat almaq mümkün.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
