95 ukrayinalı Rusiye esirliginden Ukrayinağa qayttı, dep bildirdi Ukrayina prezidenti Volodımır Zelenskıy.
«95 insanımız kene evde. Mariupol ve «Azovstal», Donbas, Lugansk vilâyeti, Kyiv vilâyeti, Harkiv vilâyeti, Çerniğiv vilâyeti, Herson vilâyetini imaye etken arbiyler. Ukrayina öz insanlarını Rusiye esirliginden qurtarğan er seferinde azatlıq Rusiye apsinde bulunğan er keske qaytarılacaq künni yaqınlaştıramız», – dep yazdı o, Telegramda.
Bu deñişüvniñ hususiyeti şunda ki, Rusiye mahkemelerinde lafta ükümler alğan ukrayinalılar evge qayta: 28-i uzun müddetke, 20-si ise ömür boyu mahkeme cezasına, dep qayd etti Ukrayina cenk esirlerine munasebet koordinatsiya ştabı.
Esirlikten azat etilgenler arasında aq qorçalayıcı, jurnalist ve arbiy Maksım Butkevıç bar.
Bundan evel Birleşken Arap Emirlikleriniñ devlet haber agentligi memleketniñ yardımınen Rusiye ve Ukrayina oktâbrniñ 18-nde 190 arbiy esirni deñiştirdi, dep bildirdi. Rusiyeniñ Mudafaa nazirligi Telegramda yazğanına köre, qaytıp kelgen 95 Rusiye askeri Beyazrusiyede tibbiy teşkerüvden keçe.
Rusiye Federatsiyasınıñ Ukrayinağa qarşı büyük istilâsı başlağanından iyul ayına qadar Rusiye esirliginden 3405 adam qaytarıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
