2023 senesi noyabrniñ ortasında Rusiye esirliginde 4337 ukrayınalı arbiy ve vatandaş buluna, 1953 insan esirlikten azat etilgen edi, dep bildirdi Ukrayınanıñ vaqtınca işğal etilgen topraqları meseleleri nazirliginiñ matbuat hızmeti.
2014 senesinden başlap Rusiye ya da tayin etken sahte «DNR» ve «LNR» memuriyetleri tarafından esir alınğan 4337 insandan 3574-ü arbiy ola, daa 763 kişi vatandaş, dep bildirdi nazirlik yanındaki esirlik meseleleri komissiyası.
Ukrayına Reintegratsiya nazirligi qayd etkenine köre, esir ukrayınalılarnıñ sayısı Rusiye esirliginde tutulğan insanlarnıñ kerçek sayısını aydınlatmay, çünki nazirlikniñ tek soyları haber etken insanlar aqqında haberi bar.
«Lâkin esirlikte tutulğan bazı insanlar ya da qoranta azaları Reintegratsiya nazirligine muracaat etmedi ve Ukrayınağa qarşı silâlı istilâ neticesinde azatlıqtan marum etüv qayd etilmedi», – dep bildirdi nazirlikniñ matbuat hızmeti.
Ukrayına ve Rusiye soñki sefer bu yıl avgust ayında esirlerni deñiştirdi. 22 Ukrayına arbiyi evge qayttı. O vaqıttan berli arbiylerni deñişüv olmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
