Ukrayina prezidenti Volodımır Zelenskıy Ukrayinağa "pek yahşı haberlernen" qaytqanını bildirdi.
"Bugün menim bütün aytışmalarımnıñ esas meselesi Ukrayinanıñ pekitilmesidir, bu kelecek sene, bu mustaqillik oğrunda ğalebege doğru arekettir. Evge pek yahşı haberlernen qaytam. Prezident Biden bugün Ukrayinağa 2 milliard dollarlıq yañı arbiy yardım paketini ilân etti. Paketniñ eñ küçlü elementi Patriot kompleksidir. Mudafaamıznı emiyetli derecede quvetleştirecek bir şey. Bu Ukrayina içün semereli ava qalqanınıñ yaratılması yolunda müim bir adımdır", - Joseph Biden ile ortaq matbuat konferentsiyası vaqtında Ukrayina devlet başı dedi.
Dekabrniñ 21-nde ABD Ukrayinağan 1,85 milliard dollarlıq yañı arbiy yardım paketini ilân etti. Washington ilye defa Ukrayinağa Patriot ava ücüminden mudafaa sistemasınıñ batareyasını ve onıñ içün arbiy yedekler berdi.
Cenk başlanğandan berli episi olıp Amerika Birleşken Devletleri Ukraiynağa tahminen 21,2 millird dollarlıq yardım berdi.
Volodımr Zelenskıy ve Joseph Biden üç saat qadar devam etken eki taraflı körüşüv keçirdiler.
Washington ziyareti Volodımır Zelenskıynıñ Ukrayinağa qarşı büyük Rusiye istilâsı başlağanından ilk çetel ziyareti oldı.
Ukrayina akimiyetiniñ malümatına köre, dekabrniñ 20-nde Ukrayina prezidenti Volodımır Zelenskıy Donetsk vilâyetindeki Bahmutta Ukrayina arbiyleri ile körüşti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
