Saba saat 6:00-larda ballistik raketalarnıñ darbesine Harkiv oğradı, şeerde ondan ziyade patlav eşitildi.
«Duşman ücümlerinden soñ bir qaç yanğın çıqtı, vatandaş mesken olmağan infrastruktura zarar kördi», – dedi Harkiv vilâyetiniñ devlet idaresiniñ reisi Oleg Sinegubov.
Bir qaç kişi yaralandı, eñ az üç adam cam yaralarınen hastahanelerge ketirildi.
Soñra Harkiv vilâyetindeki başqa mesken noqtaları, em de Dnipro şeeri ve Dnipropetrovsk vilâyeti ücümge oğradılar. Em qanatlı, em de aviatsiya raketalarınen darbe endirildi.
«Sabadan berli Rusiye ordusı Dnipropetrovsk vilâyetine kütleviy şekilde ücüm ete. O, regionnıñ energetika sistemasını yoq etmege tırışa», – dedi Dnipropetrovsk vilâyet devlet idaresiniñ reisi Serğiy Lısak.
Bundan ğayrı, Poltava vilâyetindeki Kremençug, Dnipropetrovsk vilâyetindeki Krıvıy Riğ ve Karpattaki Burştın ücümge oğradılar – anda büyük issilik elektrik stantsiyası yerleşe.
Ukrayina prezidenti Volodımır Zelenskıy dekabrniñ 13-nde energetikağa yapılğan eñ büyük ücümlerden biri olğanını aytqan edi. Onıñ bildirgenine köre, Rusiye küçleri 93 raketa ve 200-ge yaqın dron qullandılar.
Karpatı ve Lviv vilâyetindeki eñ müim infrastruktura obyektlerine Rusiyeniñ ücümi aqqında haber etildi. Ternopil vilâyetinde raketa darbesi sebebinden sanayı obyekti zarar kördi ve büyük yanğın başlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
