Ukrayina mahkemesi Aqmescitniñ Kiyev rayon mahkemesi reisiniñ muavini devlet hainliginde qabaatlanıp, 13 yılğa azatlıqtan marum etti (Ukrayina Ceza qanunnamesiniñ 111 maddesi). Bu aqta yanvarniñ 17-nde Qırım Muhtar Cumhuriyeti ve Aqyar prokuraturasınıñ matbuat hızmeti haber ete.
Müessisede bildirilgeni kibi, bu mahkemeciniñ ilhaq etilgen Qırımda ukrayinlerniñ taqip etilmesine alâqası bar. O, Qırım.Aqiqatnıñ nevbetten tış jurnalisti Vladislav Yesipenkonı, faaller Edem Bekirov ve Oleg Prıhodkonı apiste tutuv müddetiniñ uzatılması aqqında qarar aldı.
"Böylece, mahküm etilgen kişi Ukrayinanıñ suvereniteti, topraq bütünligine zarar ketirmek içün areket etti ve işğal etilgen yarımadada mahkeme akimiyetiniñ qurulmasına ve pekitilmesine yardım etti", - dep aytıla haberde.
Qırım Muhtar Cumhuriyeti prokuraturasınıñ haberinde mahkümniñ adı ve soyadı aytılmay, lâkin medianen laf etmege aqqı olmağan ve adı bildirilmege istemegen memur Qırım.Aqiqatqa aytqanı kibi, söz Anton Tsikurenko aqqında kete. Qırım yarımadası ilhaq etilmezden evel o, Sevastopol memuriy apellâtsion mahkemesiniñ mahkemecisi vazifesini eda ete edi, 2014 senesi rusiyeliler onı Aqmescitniñ Kiyev rayon mahkemesiniñ reis muavini vazifesine tayin ettiler. Bu dava boyunca onıñ açıq izaatları yoq.
Qırım Muhtar Cumhuriyetiniñ prokuraturası, Qırım ilhaqından soñ Ukrayina uquq qoruyıcıları tarafından devlet hainliginen bağlı 708 cinayet boyunca 585 cinaiy iş tahqiq etildi, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
