BM Ukrayinada insan aqları Monitoring missiyasınıñ malümatına köre, bu yılnıñ ilk sekiz ayı devamında yaralanğan barışıqsever sakinlerniñ sayısı 2024 senesine köre 40% arttı. Elâk olğanlarnıñ sayısı 17%, yaranlanğanlarnıñ sayısı 46% arttı, dep aytıla maruzada.
Avgust ayında yaqan radius areketindeki uçucısızlarnıñ darbeleri diger silâlardan daa çoq qurban sebebi oldı. 58 vatandaş elâk oldı, 272 kişi yaralandı. Maruzada aytılğanına köre, elâk olğanlarnıñ 72%-ı cebege yaqın, hususan Donetsk ve Herson vilâyetlerinde buluna ediler. 2025 senesi Rusiye ordusı uzaq radius silâsınıñ qullanıluvını faalleştirdi – cebeden uzaq yerleşken obyektlerge darbe endirmek içün qullanılğan raketa ve barraj silâ. Sentâbr ayında bu tendentsiya devam etti.
«Avgustnıñ başında uzaq darbelerde yapılğan vaqtınca teneffüs şeer rayonlarına tek vaqtınca bir yengillik ketirdi, cebege yaqın regionlarda qurbanlarnıñs ayısı yüksek qaldı. Sentâbr ayında darbeler yañıdan başladı ve, haberlerge köre, Rusiye Federatsiyası raketa ve uçucısızlarnı rekord sayıda qullandı», – dep bildirdi BM insan aqları Monitoring missiyasınıñ yolbaşçısı Daniel Bell.
Rusiyeniñ Ukrayinağa qarşı büyük istilâsı başlağanından BM Ukrayinadaki Monitoring missiyası elâk olğan eñ az 14 116 vatandaşnı qayd etti, 733-ü bala. Yaralanğanlarnıñ sayısı 36481 insan oldı, 2285-i – bala.