Ukrayinada insan aqları saasında yañı milliy strategiya quvetini aldı. Onı Prezident Volodımır Zelenskıy tasdıqladı.
Vesiqada Ukrayinada, vatandaşlığına baqmadan, er bir insannıñ aq-uquqları devlet tarafından qorçalanğanı qayd etile. Aynı vaqıtta strategiyada öz aqları bozulma havfınıñ artqanını ya da olarnı ömürge keçirüvde qıyınlıqlarğa oğray bilgen bir sıra gruppalar belgilene. Bularnıñ arasında balalar, saqatlar, tamır halqlar ve etnik azlıqlarnıñ vekilleri, LGBT+ adamlar bar.
Bundan ğayrı, aqlar bozulma havfı astında olğanlar arasında cenk veteranları, ölgen veteranlarnıñ qoranta azaları, Rusiyeniñ Ukrayinağa qarşı silâlı tecavuzınıñ qurbanları, köçkenler, Rusiyeniñ arbiy tecavuzı neticesinde şahsiy serbestliklerinden marum qalğanlar, ayrı şaraitlerde ğayıp olğanlar bar.
Uquq qorçalav organları ve mahkemelerniñ işinde, em de apiske alınğan yerlerde qanun üstünligini teminlemege, qıynaluv ve zalım munasebetniñ ögüni almağa, böyle işlerniñ vaqtında tedqiq etilmesine ve mesülietlilerniñ cezalanmasına ayrıca diqqat ayırıla.
Vesiqada o, Ukrayinanıñ Avropa Birligine kirmek yolu çerçivesinde işlep çıqarılğanı qayd etile.