Ukrayinada "Serbest Qırımğa mektüpler" cemaat teşebbüsi başlana, o, ukrainlerni ve diger memleketlerniñ sakinlerini Qırım siyasiy mabüslerine mektüpler yazmağa teşviq ete, dep haber ete ZMINA insan aqları merkeziniñ uquq qorçalayıcı teşkilâtı.
Teşebbüsniñ maqsadı - Kremlniñ ukrayinalı esirleri aqqında hatırlatmaq, olarğa destek köstermek ve destek sözlerini bildirmektir. Bundan da ğayrı, mektüpler Rusiye apishaneleriniñ memuriyetlerine er bir Ukrayina vatandaşı müim olğanını ve cemiyet olarnıñ apishanede tutuluv şaraitlerini nezaret etkenini köstere.
Fevralniñ 19-nda Kıyivde bu teşebbüsniñ başlanuvına bağışlanğan matbuat konferentsiyası ötkerilecek. Onıñ teşkilâtçıları kampaniyada nasıl iştirak etecegini, Rusiyeniñ Qırım reineleriniñ sayısını, olarnıñ tutuv şaraitini ve yardımğa muhtac olğanlarını tarif etecek olalar.
Matbuat konferentsiyası fevralniñ 19-nda saat 11:00-da «Ukraine Media Center – Ukrinform» haber agentliginde keçirilecek.
Tedbir ZMINA, PEN Ukraine, Ukraina Prezidentiniñ Qırım Muhtar Cumhuriyetindeki Temsilciliginiñ Facebook saifelerinde ve Ukrinform Youtube kanalında online yayınlanacaq.
Qırımtatar Resurs Merkezi bildirgenine köre, Qırım ilhaqınıñ başından berli 307 siyasiy mabüs ve cinaiy davalar boyunca taqip etilgenler qayd etildi, olardan 206 - qırımtatar halqınıñ vekilleri.
Ukraina prezidentiniñ Qırım Muhtar Cumhuriyetindeki Temsilciliginiñ malümatına köre, fevralniñ 5-ne qadar rusiyeliler Qırımda 208 insannı qanunsız şekilde mahküm etti. Olarnıñ arasında 125 qırımtatar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
