Ukrayina arbiyleri ilhaq etilgen Aqyar körfezinde bulunğan "Konsantın Olşanskiy" büyük desant gemisini raketalarnen urdı, dep bildirdi Ukrayina Arbiy-deñiz quvetleriniñ spikeri Dmıtro Pletençuk.
Onıñ hatırlatqanına köre, gemi 2014 senesi Qırım işğal etilgen soñ Rusiye ordusı tarafından zapt etilgen edi. Spikerniñ aytqanına köre, o zamandan berli o Aqyar körfezinde tura edi, ve onı parçalarğa ayıra ediler. Amma Rusiye Federatsiyasınıñ Qara deñiz flotunda büyük desant gemileri bitkenini añlağan soñ, olarnı ğayrıdan tiklemege qarar aldılar ve munasip işlerni başladılar.
"Bu işniñ maqsadı, añlağanımız kibi, Moskva reberligi ve Rusiyeniñ ve işğal etilgen topraqlarnıñ añlamaycaq malümat qullanıcıları içün, evelden zarar körgen büyük desant gemilerinden birini ğayrıdan tiklegenleri aqqında sahtelik yapmaq edi. Bu ya "Minsk" ya da "Olenegorsk dağcısı" ola bile, çünki o yerde zarar körgenleri içün olarnı ğayrıdan tiklemek alâ daa sual altında. Şunıñ içün de, böyle bir fikir bar edi: olardan biri bizim gemimiz olğanını köstermek. Şunıñ içün, bu gemi Ukrayinağa qarşı qullanılmaq kerek edi, yazıq ki. Şunıñ içün bu birlikni de Neptunımıznen yoq etmege qarar alındı", – dep tarif etti spiker.
Ukrayina Arbiy-deñiz quvetleri bildire ki, martnıñ 24-nde Aqyarğa etilgen raketa ücüminde BDG "Konstantin Olşanskiy" zarar kördi. O vaqıt "Yamal" ve "Azov" desant gemileri, em de "İvan Hurs" keşif gemisi zarar kördi.
Bu gemilerniñ episi yoq etildi dep aytmaq mümkün degil. Zararnıñ derecesi daa ögrenile.
Qırım.Aqiqat muarririyeti ukrayin tarafınıñ beyanatını tasdıqlap olamay.
"Konstantin Olshanskiy" 775 leyhasınıñ vekili, NATO kodifikatsiyasına köre – Ropucha, lehçeden "baqa" demektir. Gemiler deñiz desantını donatılmağan yalı boyuna endirmek ve deñizde ordu ve yüklerni taşlamaq içün yapılğan. Çeşit türlü zırhlı tehnikanı, şu cümleden tanklarnı ve 340 kişige qadar şahsiy erkânnı taşımaq mümkün. Bu leyhanıñ gemileri Rusiye desant flotunıñ temeli ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
