Ukrayinada Rusiye istilâsı neticesinde 548 bala elâk oldı, eñ azından 1351 bala yaralandı, dep bildire Ukrayina baş prokurorınıñ ofisi.
Qayd etilgenine köre, eñ çoq zarar körgen balalar Donetsk vilâyetinde - 532, Harkiv vilâyetinde - 378, Herson vilâyetinde - 152, Dnipropetrovsk vilâyetinde - 139, Kıyiv vilâyetinde - 130, Zaporojjâ vilâyetinde - 108, Mıkolayiv vilâyetinde - 105.
Baş prokurornıñ Ofisinde qayd eteler ki, raatlıq künleri Harkivde Rusiye ava ücüminde bir bala 12 yaşında qız elâk oldı, daa üç 13 yaşında, 9 yaşında ve 12 yaşında oğlanlar Harkiv vilâyetiniñ Boguslavka köyüne ve Harkivge Rusiye tarafından açılğan ateş neticesinde yaralandı.
Mayısnıñ 13-nde Birleşken Milletler Teşkilâtınıñ Balalar fondu (UNICEF) bildirdi ki, Rusiye istilâsından soñ Ukrayinada eñ azından 1993 bala elâk oldı ya da yaralandı. Fondnıñ malümatına köre, bu er kün ortalama eki bala. Bu, Birleşken Milletler Teşkilâtı teşkergen raqamlar, amma kerçek raqamlar daa çoq ola bile.
Rusiye arbiyleri çeşit silâlardan Ukrayina regionlarına muntazam surette ücüm ete. Delillerge ve şaatlıqlarğa baqmadan, Moskva, tam bir istilâ başlağanından berli, vatandaşlarğa qarşı yapılğan ücümni red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
