2,5 yıl devamında Qırımnıñ uquq qoruyıcı organları Ukrayina Cinaiy kodeksinde "kollaboratsiya faaliyeti" maddesiniñ çeşit qısımları boyunca 475 dava açtılar. Bu aqta Qırım.Aqiqat efirinde QMC Prokuraturası bölüginiñ reberi Yegor Rebrov bildirdi.
Memurnıñ qayd etkenine köre, 475 davanıñ tahqiqatı neticesinde 276 şahısqa şübeli sayılğanı aqqında haber etildi, 166 qabaatlav aktı mahkemege yollanıldı.
"İlk evelâ, söz bu maddeniñ 5-inci qısmı aqqında ketmekte. Bu işğalci memuriyet organlarında, işğalci akimiyet organlarında memuriy-hocalıq ve reberlik vazifelerinen bağlı vazifelerni eda etüvdir. Bular, saylav komissiyalarınıñ reberleri olğan ve vaqtınca işğal etilgen topraqta qanunsız saylavlar keçirilmesini teşkil etken şahıslardır", — dep tarif etti Rebrov.
Prokuraturanıñ açıq qabaatlavı boyunca ukrayin mahkemeleri 13 insanğa nisbeten 12 üküm çıqardı.
Rebrov añlattı ki, kollaboratsionizmde er bir qabaatlav "cinayetniñ obyektiv tarafı" ne derecede yapılğanını köz ögüne alıp, ayrı baqıla. Meselâ, Rusiye Federatsiyasınıñ pasportını alğanıñız içün Ukrayinada cinaiy mesüliyet yoq.
Ukrayina prezidentiniñ Qırım Muhtar Cumhuriyetindeki temsilcisi Tamila Taşeva bildirdi ki, "Qırımnıñ işğalden azat etilmesinden soñ Ukrayinanıñ esas vazifelerinden biri — yarımadanıñ Rusiye tarafından ilhaqına yardım etkenlerni tapmaq ve mesüliyetke çekmek olacaq". Onıñ aytqanına köre, insanlıqqa qarşı cinayetler ve arbiy cinayetler yapqanlar, insan aqlarını bozğanlar ve genotsid olaraq tanılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
