Ukrayinada "Virtual hatıra alanı. Qırım tirenüvi müzeyi" online leyhası meydanğa ketirildi. O, 2014 senesinden berli Rusiyeniñ Qırım ilhaqına qarşılıq köstergen, siyasiy taqip ve repressiyalarnıñ qurbanı olğan insanlarğa bağışlana.
Saytta qayd etilgenine köre, leyha işğalci akimiyet cinayet davaları ve statistikağa çevirimege tırışqan insanlarnıñ ikâyelerini aytıp bere. Diqqat merkezinde — hususiy insanlar: olarnıñ qorantaları, zenaatları, arzuları ve er künlik yaşayışları tura. Sergi repressiyalar aqqında degil de, insan taqdiri etrafında qurulğan.
Aq qorçalayıcı teşkilâtlarnen, siyasiy mabüslerniñ ve azat etilgenlerniñ tuvğanlarınen işbirlik ayrı yer ala. Olar taqiplerni qayd eteler, qorantalarğa destek köstere, delil toplay ve qanunsız sürette apiske alınğanlarnıñ azat etilmesini talap eteler.
Rusiye apishanelerinden azat etilgenlerniñ ikâyeleri müim menba ola. Azat etilgenler esirlikte qalğan insanlarnı, apis şaraitlerini, işkence, hastalıq ve ruhiy basqı aqqında hatırlaylar. Yanlarında alâ daa apis etilgenlerniñ tuvğanları tura. Olar yaqınlarını yıllar devamında bekleyler ve dünya olarnıñ adlarını unutmasın dep, olarğa qoltutalar.
Müzey Berlindeki Mauermuseum– Museum Haus am Checkpoint Charlie ile işbirlikte buluna. Eksponatlardan biri — insan aqları qorçalayıcısı Server Mustafayevniñ Rusiye apishanesinde oğluna yaptırğan ötmek ve tespi.
Leyha, kerçek ikâyeler, vesiqalar ve şaatlıqlarnı saqlap, Rusiyeniñ dezinformasiyası ve propagandasına qarşılıq köstere.
O, Ukrayin medeniyet fondunıñ destegi ile ömürge keçirile. Arizacı - iş adamı Lera Tevfikova. Leyhanıñ umumiy büceti 3,78 mln ğrıvnâ teşkil etti.
Rusiyeniñ Qırımdaki Ukrayin vatandaşlarına qarşı repressiyaları 2014 senesi başlandı. Aq qorçalayıcılar ve halqara teşkilâtlar Qırımtatar, Ukrayin faalleri, jurnalistler ve din erbaplarına qarşı yüzlerce davalarnı qayd ete. Bir çoq mabüs, azat etilmeleri talap etilgenine baqmadan, Rusiye koloniyalarında qala.