Ukrayina uquq qoruyıcıları mahkemege "Qırım Cumhuriyetindeki qırımtatarlarnıñ regional milliy-medeniy muhtariyeti" teşkilâtınıñ reisine qarşı qabaatlav aktını yolladı. Bunı Qırım Muhtar Cumhuriyetiniñ prokuraturası bildire.
Qayd etilgenine köre, 2022 senesi Rusiye kütleviy haber vastalarından birisiniñ efirinde iştirak etken kişi yarımadağa Ukrayina suverenitetiniñ tarqalmasını red etti ve çetel liderlerini Qırım ilhaqını tanımağa çağırdı.
"2022-2023 seneleri qabaatlanğan içtimaiy ağda Ukrayina toprağında cenk areketlerinde iştirak etken istilâcı devletniñ ayrı bölüklerine "yardım" toplağanı ve bergenini derc etti. Hususan, 810-ıncı ayrı deñiz piyade gvardiya brigadası ve Sankt-Peterburg göñülli bölügine taktik urba, maddiy resurslar, kompyuter tehnikası ve ilâhre berildi", — haberde aytıla.
Figurantnı kollaboratsiya faaliyeti, tecavuzcı devletke yardım etüv ve Ukrayinağa qarşı tecavuznı aqlağanında qabaatlaylar. O, 12 yılğa qadar apis cezasını ala bile.
Açıq malümatqa köre, "Qırım Cumhuriyetindeki qırımtatarlarnıñ regional milliy-medeniy muhtariyeti" teşkilâtınıñ reisi — Eyvaz Ümerov.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
