Ukrayinada "Millet" Rusiye telekanalınıñ mühbiri mahkeme etilecek, o, açıqtan-açıq Rusiye Federatsiyasına qol tutıp, Ukrayinağa qarşı cenkni aqlay, dep bildire Qırım Muhtar Cumhuriyeti prokuraturasınıñ matbuat hızmeti.
"Yarımada sakinleriniñ añı ile manipulâtsiya etmek ve istilâcı memleketniñ "legitim areketleri" aqqında yañlış fikir yaratmaq maqsadınen qabaatlanğan kişi Aqmescitte "Millet" telekanalınıñ studiyasında müellif programmasını alıpbara. Mında mühbir muntazam sürette Rusiye tarafdarı olğan malümatnı tarqata", – dep aytıla haberde.
Qayd etilgenine köre, yayınlardan biriniñ canlı efirinde iştirakçi Ukrayina topraqlarınıñ işğaline "tuvğan limanğa, evge qaytmaq" kibi qıymet kesti.
"Qabaatlanğan şahıs areketlerini aqlap, devletimizniñ kritik infrastrukturalarına yapılğan darbelerni Ukrayina tarafından yapılğan tecavuz ve teraktlarğa cevap dep adlandıra ve duşmanlarnı maqtay", - dep añlattı prokuratura.
Qabaatlanğannıñ areketleri kollaboratsiya faaliyeti olaraq tasnif etildi ve RF-niñ Ukrayinağa qarşı silâlı tecavuzını red etüv, aqlav. Oña 12 yılğa qadar apis cezası berile bile.
Beyanatta qadınnıñ adı ve soyadı aytılmay, amma medianen laf etmege aqqı olmağan memur Qırım.Aqiqatqa aytqanı kibi, söz Ayşe Şulakova aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
