Oktâbrniñ 30-na keçken gece ukrayinalı arbiyler Qırımnıñ ğarbiy yalısındaki Ava mudafaası sistemasına darbe endirdiler.
Bundan ğayrı Lugansk yanında da S-400 Ava mudafaası sistemasınıñ yoq etilüvi aqqında haber eteler.
Evel Rusiye telagram kanalları RF arbiyleriniñ yaralanması aqqında haber etken ediler. Astra bildirgeni kibi, gece saat 3-lerde Olenevka köyü yaqınlarında yerleşken Rusiye ava mudafaasınıñ raketa-zenit polkuna ücüm etilgen. Neticede 17 arbiy yaralanğan, 5 maşna zarar körgen, olardan biri artıq tamir etilmez de.
Rusiye tarafı bu malümatnı izaatlamadı.
Qırım.Aqiqatnıñ malümatına köre, Olenevka yaqınlarında kerçekten de Rusiye ava mudafaası sistemaları yerleşe. Avgust ayında anda patlav yüz bergen edi, Ukrayina Mudafaa nazirligi S-400 "Triumf" Rusiye zenit-raketa kompleksiniñ yoq etilüvi aqqında bildirgen edi.
Oktâbrniñ 30-na keçken gece Aqyarğa dronlar ile ücüm etilgenini bildireler. Qırım.Aqiqat mühbiri şeerde atış sesleri eşitilgenini haber etti. "Krımskiy veter" telegram kanalı yerli sakinlerge atfı etip, Aqyar körfezinde eki küçlü patlav sesi eşitilgenini iddia ete. Biraz soñra şeerniñ işğal yolbaşçısı Mihail Razvojayev RF Qara deñiz flotu "pilotsız uçaqlarnıñ ücümini urıp qaytara edi" dep bildirdi. Şimaliy körfez civarındaki tütün RF arbiyleri gizlenmek içün qullanğan tabell vastalarıdır. Diger tafsilât yoq.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
