"Knığa-mandrivka. Ukrayina" leyhası, oyun şeklinde tasviriy neşirler ve çizgi filmler yarata. Leyha 2017 senesi Green Penguin kreativ agentligi tarafından Ukrayina medeniyet fondunıñ destegi ile meydanğa ketirildi.
"Mulfilm seyircilerni Qırımnıñ medeniy zenginligi, hususan belli usta Mehmed Efendiniñ qalem sanatı, Bağçasaray sarayınıñ mimariy büyükligi, Qurultaynıñ qırımtatarlarnıñ öz-özüni idare etüv organı olaraq tarihiy emiyeti ve sürgünlikniñ facialı vaqiaları ile tanış ete", — dep bildireler müellifler.
Olar qayd ettiler ki, Qırım ukrayin mirasınıñ ayırılmaz bir parçasıdır. "Qırımnıñ Ukrayina ile ayırılmaz bağı onıñ qadimiy şeerleriniñ er bir taşında, nesilden nesilge keçken yırlarında ve adetlerinde yazılğan. Bu, şimdiki şaraitlerge baqmadan, ukrayin kimligini teşkil etken miras", — dep qayd etti leyhanıñ müellifi İrına Taranenko.
Filmniñ baş ikâyecisi Qırım timsallerinden biri Çağaladır. Onı qırımtatar asıllı ukrayin aktörı ve rejissörı Ahtem Seitablayev seslendirdi.
"Bu leyha menim içün ukrayinlerge ve dünyağa Qırım Ukrayina olğanını ve tamır halqlarnıñ tarihı ve medeniyeti umumiy ukrayin kimligimizniñ ayırılmaz bir parçası olğanını hatırlatmaq içün bir fırsattır. Rusiye tarafından işğal etilgen bu qıyın vaqıtta Qırım aqqında aytmaq pek müim, onıñ kerçek keçmişi aqqında aytmaq ve Qırım Ukrayinanıñ olğanını ve olacağını qayd etmek borcum olğanını tüşünem", — dep qayd etti Ahtem Seitablayev.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
