Mayısnıñ 2-nde bunıñnen bağlı üküm çıqarıldı. Jurnalist taqiqatları merkeziniñ malümatına köre, 52 yaşındaki Sergey Yuhenko mahküm etildi. O, 2013 senesi mayıs ayında Qırım Muhtar Cumhuriyetinde Ukrayina İç işler nazirliginiñ Qurman rayon bölüginiñ yolbaşçısı vazifesine tayinlendi.
Qırım Rusiye tarafından ilhaq etilgen soñ, 2014 senesi baarde, Yuhenko antnı bozıp, Rusiye İç işler nazirliginiñ Aqmescit idaresiniñ qanunsız şekilde teşkil etilgen 1-inci polis bölüginiñ yolbaşçısı vazifesine keçti.
"Polisniñ" bu rayon bölügine işğalniñ 10 yılı devamında Rusiye quvetçileri qanunsız tutulğan qırımtatar ve Ukrayina tarafdarı faallerni sorğuğa çekmek ve protokollar tizmek içün ketire", — dep haber ete Jurnalist taqiqatları merkezi
Ukrayina prezidentiniñ Qırım Muhtar Cumhuriyetindeki temsilcisi Tamila Taşeva bildirdi ki, "Qırımnıñ işğalden azat etilmesinden soñ Ukrayinanıñ esas vazifelerinden biri - yarımadanıñ Rusiye tarafından ilhaq etilmesine yardım etkenlerni tapmaq ve mesüliyetke çekmektir". Onıñ aytqanına köre, insanlıqqa qarşı cinayetlerni ve arbiy cinayetlerni yapqanlar, insan aqlarını bozğanlar ve genotsid kibi tanılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
