O, Yuqarı Rada Meclisni endi tanığanına baqmadan, Ukratina Nazirler Kabinetinde qırımtatarlarnıñ temsiliy organı olaraq qayd etilmesi aqqında Meclisniñ vesiqaları bir yıldan ziyade yatqanını hatırlattı. Bundan da ğayrı, Celâl, Qırımtatar resurs merkeziniñ reisi Esender Bariyevniñ Nazirler şurasına qarşı dava açtırması onıñ şahsiy qararı olğanını ayttı.
"Bu Qırımtatar Milliy Meclisiniñ qararı degil edi. Aytmaq kerek ki, qayd etüv ile oğraşmaq vazifesi oña berildi. Ve böyle yapmaq kerek olğanını tüşündi. Mecliste er kes buña razı degil", — dep bildirdi Celâl.
O qayd etti ki, Meclis baş nazir, Ukrayina prezidentiniñ Ofisi ile siyasiy dialog qurmağa ve "meseleni siyasiy yolnen çezmege" tırışa.
Celâlnıñ fikrine köre, qırımtatarlarnıñ meseleleriniñ çezilüvi, hususan milliy-territorial muhtariyetke ıntıluvları, topraq bütünligi meselesiniñ çezilüvi ile sıq bağlıdır.
"Ve eñ esası — 2014 senesi olıp keçkenlerniñ tekrarlanmaması kefaleti. Çünki qırımtatarlarnıñ Qırım toprağına tamır halqı olaraq tabiiy aqqı bar, o, bu topraqqa ruslarnıñ tarihiy istilâsını istisna etecek. Çünki endi açıq-aydın olacaq, Rusiyeniñ uydurğan bir Qırım halqı aqqında aytqanı kibi degil, Ukrayina açıq-aydın muracaat etecek, bizim tanılğan tamır halqımız bar, bu onıñ tuvğan toprağı, bunı iç kimse inkâr etmey. Ve olar mustaqil, yekâne Ukrayina devleti çerçivesinde öz taqdirini belgilev aqqını amelge keçire", — dep yekünledi Meclis reisiniñ birinci muavini.
Qırımtatar Milliy Meclisi — qırımtatarlar tarafından saylanğan temsiliy organ. Lâkin o, alâ daa Ukrayina uquqiy alanında subyekt olaraq bulunmay ve uquqiy şahıs degildir.
2023 senesi iyünniñ 5-nde Meclis qırımtatar halqınıñ temsiliy organı olaraq Meclisniñ uquqiy statusını belgilemek içün Ukrayina akimiyetiniñ mütenasip organlarına vesiqalar paketi berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
