Lammy, Ukrayina prezidenti Volodımır Zelenskıy ve Kyivdeki Ukrayina memurlarınen körüşip, «ABD memuriyeti zıddiyetni toqtatmaq içün ne qadar ğayret kösterse de, Ukrayinada cenk areketleriniñ bitmesi aqqında muzakereler yaqın vaqıtta olmaycaq», dep qayd etti.
«Barışıq muzakerelerine qadar aftalar qaldı, dep tüşünmeyim. Ve bunı aytam, çünki, eminim, ABD de paylaşqan fikrimizge köre, Putin muzakerelerge azırlanğanını ve cenkni bitirmege istegenini köstermey», – dedi o.
Nazir, onıñ fikirince, «cenk areketleri daa bir qaç ay devam etecek, çünki Ukrayina arbiyleri memleketiniñ kelecegi oğrunda küreşmege devam ete», dep qayd etti.
«Ukrayinliler muzakerelerden evel ateş toqtatılmaycağını añlay. Şunıñ içün yaqın vaqıtta bu cenkte ateş toqtaycağını beklemeyim. Men Putin şimdi muzakere keçirmege istemegenini añlayım. Ve şu sebepten, ne yazıq ki, bu cenk daa bir qaç ay devam eter, dep tüşünem», – dep qoştı Lammy.
Yanvarniñ 31-nde ABD devlet kâtibi Marco Rubio Rusiyeniñ Ukrayinağa qarşı cenki taraflarnıñ «maksimalist maqsatlarına» irişmesinen bitirilmeycegini bildirdi ve ilerideki muzakerelerde eki taraf da uzlaşuvlarğa razı olmağa mecbur olacaq, dep daa bir kere qayd etti.
Ukrayina prezidenti Volodımır Zelenskıynıñ fikrince, Trump Rusiyeniñ energetika ve bank sektorlarına qarşı sanktsiyalarnı quvetleştirip ve Kyivge arbiy yardımnı devam ettirip, Putinni muzakere masasına oturmağa mecbur ete bile.
Yanvarniñ 20-nde Rusiye prezidenti Vladimir Putin Rusiye Havfsızlıq Şurasınıñ toplaşuvında Rusiye ABD prezidenti Donald Trumpnıñ yañı memuriyetinen Ukrayina boyunca dialogğa açıq olğanını bildirdi.
Fevralniñ 4-nde Britaniya jurnalisti Pirs Morganğa bergen intervyüsında Ukrayina prezidenti Volodımır Zelenskıy «Ukrayina vatandaşlarına barışıq ketirecek başqa yol olmasa», Rusiye prezidenti Vladimir Putinnen barışıq muzakereleri içün oturmağa azır olğanını ayttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
