"Oda Büyük Britaniyanıñ yarımada ile tarihiy alâqalarını, şu cümleden Qırım cenki vaqtında alâqalarını köstere ve Birleşken Qırallıqnıñ Ukrayinanıñ topraq bütünligine qol tutqanını qayd ete, çünki Qırım Ukrayinadır", — denile beyanatta.
Odanıñ maqsadı Qırım ealisine, hususan qırımtatarlarnıñ medeniyetine ürmet köstermektir. Kiyevdeki Büyük Britaniya elçihanesi yarımadada qırımtatarlarnıñ zengin ve qadimiy medeniyetini köstermek içün qırımtatar artefaktlarını: metall, keramika ve belli ustalarnıñ basmalarını mahsus satın aldı.
"Oda içinde toplanğan artefaktlar arasında Büyük Britaniya ükümetiniñ kollektsiyasından şotland ressamı Uilyam Simpsonnıñ gravüra kollektsiyası bar, o, Qırım cenki vaqtında britaniyalı quvetlerni begenip, andan vaqialarnı yapqan edi", – dep qayd ete elçilikniñ matbuat hızmeti.
Bundan da ğayrı, odada Qırım cenki zamanında yapılğan ve Britaniya elçihanesi tarafından yengil dragunlarnıñ polk müzeyinen alınğan asıl medaller bar. Olarnıñ arasında Balıqlava cenki vaqtında yengil brigada ücüminiñ iştirakçisine ölümden soñ berilgen medal de bar.
Kıyivdeki Frenkistan ve İtaliya elçilikleri de elçi Harriske Qırım cenkinde britaniyalılarnen beraber cenkleşken sard ve fransız ordularınıñ gravüralarını bağışladılar.
"Bu, keçken sene elçi vazifesine kelgen soñ, men azırlağan bir leyha. Qırım Ukrayinanıñ bir parçasıdır, hususan Büyük Britaniya tarihında müimdir. Şeerlerimizde Qırım cenkiniñ hatıraları ve Qırımdaki yerlerniñ adları ile adlandırılğan soqaqlar bar. Bu tarihiy bağnı rezidentsiyamda numayış etmek ve Rusiye repressiyalarından çoq vaqıt devamında zarar körgen qırımtatar halqınıñ medeniyetini köstermek istedim. Kıyivdeki Büyük Britaniya elçisiniñ rezidentsiyasındaki yañı Qırım odası Birleşken Qırallıqnıñ Ukrayinanıñ topraq bütünligine qol tutqanını ve Qırım "Ukrayina" olğanını tasdıqlay", — dep bildirdi elçi Martin Harris.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
