Aprelniñ 20-si itibarınen belli olğanı kibi Ukrayinada Rusiye istilâsı neticesinde 545 bala elâk oldı, eñ azdan 1298 bala yaralandı, dep bildire Ukraina baş prokurorınıñ ofisi.
"Aprelniñ 19-nda Dnipropetrovsk vilâyetiniñ Sinelnikov şeerinde ateş açılğanı neticesinde 8 yaşında oğlan ve 14 yaşında qız elâk oldı. Aprelniñ 19-nda Mıkolayiv vilâyetiniñ Solonçaki köyünde açılğan ateş neticesinde 14 yaşında bala yaralandı", – dep aytıla haberde.
Ukrayinada insan aqları boyunca BMT nezaret missiyası 2024 senesi mart ayında Ukrayinada eñ azından 604 vatandaş öldürildi ya da yaralandı, bu fevral ayına köre 20 fayızğa çoqça, dep bildirgen edi.
BM, Rusiye Federatsiyasınıñ tam miqyaslı istilâsı başlağanından berli Ukrayinada 10 810 vatandaşnıñ elâk olğanı, 20 556 yaralanğanı aqqında malümatnı tasdıqladı. Teşkilât, elâk olğanlarnıñ sayısı daa çoq olğanını tahmin ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
