Ukrayınada Rusiyeniñ fevralniñ 24-nde başlağan büyük istilâsı vaqtında 459 bala elâk oldı ve daa 918 bala farqlı seviyede yaralar aldı, dep haber ete Ukrayına Baş prokurorınıñ ofisi.
«Yanvarniñ 31-nde duşmannıñ Donetsk vilâyetiniñ Bahmut şeerine açqan ateşi neticesinde 16 yaşında oğlan yaralandı», – dep aytıla haberde.
Prokuratura, raqamlar tam degil, çünki faal uruşlar devam etken, işğal etilgen ve azat etilgen topraqlarda iş devam ete.
Rusiye ordusı atqan bomba ve ateşler sebebinen 3126 oquv yurtu zarar kördi, 337-si bütünley yoq etildi.
BM insan aqları yuqarı komissarınıñ idaresi Rusiye Ukrayınağa qarşı büyük istilâ kerçekleştirip başlağanından 7110 insannıñ ölümini ve 11547 insannıñ yaralanğanını tasdıqladı. 2023 senesi yanvarniñ 1-nden 29-na qadar 170 Ukrayına barışıqsever sakininiñ elâk olğanı ve 506-sınıñ yaralanğanı qayd etildi.
Teşkilât elâk olğanlarnıñ kerçek sayısı daa yüksek, dep qayd ete. Faal uruşlar devam etken ve işğal altında qalğan topraqlardan malümat almaq zor olğanı içün ve isbatlanması qıyın olğanı içün kerçek sayı belli degil.
Umumen cenk vaqtında Ukrayında yerli sakinlerniñ onlarnen kütleviy öldürilüvi qayd etildi. Bıltır mart ayında Buça ve İrpin Ukrayına ordusı tarafından azat etilgen soñ yedi yüz vatandaşnıñ cesedi tapıldı. O ayda Rusiye aviatsiyası Mariupol drama teatrini bombalağanı içün, Ukrayına akimiyetiniñ malümatına köre, tahminen 300 insan elâk oldı. 50 barışıqsever sakin aprel ayında Kramatorsk vokzalına kerçekleştirilgen raketa darbesi neticesinde elâk oldı, 48 kişi Çasiv Yar şeerinde çoq qatlı evge açılğan ateş neticesinde can berdi, o ayda Vinnıtsâğa qarşı raketa darbesi neticesinde 27 insan elâk oldı. Avgust ayında, Ukrayına mustaqilli kününde, Rusiye Dnipropetrovsk vilâyetiniñ Çaplıno tren stantsiyasına raketadan darbe endirip, 25 vatandaşnı öldürdi. Oktâbr ayında eñ büyük raketa darbelerinden biri vaqtında 30-dan çoq barışıqsever sakin elâk oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
