Jurnalistler Ukrayınada cenkte elâk olğan 45123 Rusiye arbiyiniñ adını bildi. Bunı BBC Rus hızmeti ve «Mediazona» göñüllilernen beraber saydı.
Qayd etilgen elâk olğanlarnıñ üçte ekisi – istilâ başlamazdan evel ordunen alâqası olmağanlar: göñülliler, seferber etilgenler, eski mabüsler ve sahte şahsiy arbiy kompaniyalardan «yañı kelgenler». Seferber etilip elâk olğan 5406 insandan 80%-ı cenkniñ ekinci yılında elâk oldı.
Elâk olğanlarnıñ sayısına köre Krasnodar ülkesi, Svedrlovsk vilâyeti, Başqortostan ve Çelâbinsk vilâyeti lider olalar.
2023 senesi jurnalistler elâk olğan 27906 Rusiye arbiyiniñ adını qayd etti, bu raqam Ukrayınağa qarşı büyük istilânıñ ilk yılında olğan tasdıqlanğan vefat sayısından 57 fayız çoq.
2023 senesi oktâbr ayından 2024 senesi fevral ayına qadar – Rusiye bölükleri Avdiyıvka civarında ve qomşu Donetsk vilâyetiniñ rayonlarında ücüm etkende – tedqiqatçılar 6614 Rusiye arbiyiniñ elâk olğaını tasdıqladı.
Jurnalistler açıq menbalarğa köre saya – yerli memuriyet, kütleviy haber vastaları ve elâk olğanlarnıñ soy-sopları bergen malümatqa esaslanıp ve mezarlıqlardan kelgen haberlerge köre. Olarnıñ fikirince, vefat sayısı eñ az eki qat çoq ola bile.
Qırım.Aqiqat jurnalistleri Rusiyeniñ Ukrayınağa qarşı büyük istilâsı başlağanından Qırım ve Aqyardan elâk olğan 620 Rusiye arbiyiniñ şahsiyetini ögrenip oldı. Rusiye tarafı bu malümatnı resmiy şekilde izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
