Ukrayina Yuqarı Radası Qırım işğaline tirenüv kününde çetel devletleriniñ parlament ve ükümetleri, halqara teşkilât ve parlamentlerara assambleyalarğa beyanatnı 291 reynen tasdıqlap, olarnı Rusiye istilâsına qarşı küreşte Ukrayinağa qoltutmağa çağırmağa devam etti.
Rey berüv neticeleri Ukrayina parlamentiniñ resmiy saytında derc etildi.
Vesiqağa köre, Qırım meselesi «Ukrayina içün eñ müim ola», yarımadanıñ işğalden azat etilüvi ise devletniñ «topraq bütünligini ğayrıdan tiklevniñ ayırılmaz parçası» ola. Beyanatta Rusiyege qarşı sanktsion basqı, cenk cinayetleri, işğal etilgen Qırımda sistematik repressiyalar ve insan aqlarınıñ bozuluvı içün mesüliyet quvetleştirilmeli.
Qırım işğaline tirenüv künü – fevralniñ 26-nda qayd etilgen hatıra künüdir. 2014 senesi bu künü Aqmescitte Qırımtatar Milliy Meclisi tarafından teşkil etilgen Ukrayina topraq bütünligine qoltutuv mitingi olıp keçti. Aktsiya Rusiye işğaline qarşılıq kösterüviniñ esas tedbirlerinden biri oldı.
2020 senesi Ukrayina prezidenti öz buyruğınen fevralniñ 26-nı Qırım Muhtar Cumhuriyeti ve Aqyar şeeriniñ işğaline tirenüv kösterüv resmiy künü olaraq tasdıqlap, yarımadanıñ Ukrayina suverenitetine qaytarılması içün küreşniñ müimligini qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
