Qırımtatar sürgünliginiñ 80 yıllığına dair muracaatnı Rada çarşenbe künü qabul etti, dep bildirdi halq deputatı Yaroslav Zeleznâk.
Bundan da ğayrı, Ukrayina parlamenti halqara toplulıqqa muracaat ete:
- Ukrainanıñ ilhaq etilgen Qırım üzerindeki suverenitetini ğayrıdan tiklemege yardım etmek;
- Rusiye Federatsiyasınıñ Ukrayinağa qarşı tecavuz cinayeti boyunca Mahsus halqara mahkemesiniñ meydanğa ketirilmesine qol tutmaq;
- Halqara Qırım platforması çerçivesinde ükümet ve parlament seviyelerinde keçirilgen tedbirlerge faal qoşulmaq;
- Birleşken Milletler Teşkilâtınıñ azası olğan ve BM Havfsızlıq Şurasınıñ daimiy azası olğan Rusiyeden qırımtatar halqınıñ öz temsiliy institutlarını saqlap qalmaq aqqına qanunsız sıñırlavlarnı lâğu etmesini, şu cümleden BMT Halqara mahkemesiniñ Qırımtatar Milliy Meclisiniñ işini ğayrıdan başlatmaq qararını yerine ketirmesini talap etmek.
Ukrayina Tış işler nazirligi ortaqlarını 1944 senesi qırımtatar halqınıñ sürgünligini genotsid olaraq tanımağa çağırdı ve Rusiyeden işğal etilgen Qırımda insan aqlarınıñ bozulmasını toqtatmasını talap ete.
1944 senesi mayıs 18-de sovet rejimi bütün qırımtatar halqını Qırımdan Orta Asiyağa sürgün etmege başladı. Üç kün devamında onlarnen demir yol vagonları 200 biñ qırımtatarnı zorbalıqnen alıp ketti.
Er yıl Qırımda qırımtatar halqı sürgünliginiñ qurbanlarını añma künü munasebetinen kütleviy tedbirler, şu cümleden Qırım paytahtınıñ merkezinde matem mitingi keçirile edi. Amma Qırım yarımadası Rusiye tarafından ilhaq etilgen soñ, Aqmescit merkezinde bu kibi aktsiyalarnıñ keçirilmesi yasaq etildi.
Qırımtatar Milliy Meclisiniñ reisi Refat Çubarov bildirdi ki, teşkilât qırımtatar halqı genotsidiniñ qurbanlarına abideni qurmaq içün leyha azırladı. Onı endi işlep çıqaralar, yerleştirüv yeri muzakere etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
