Kelecek 10 yıl devamında Ukrayınağa qoltutmaq içün ortaqlarından er yıl 10 milliarddan 30 milliard dollarğa qadar yatırımlar kerek. Bu aqta baş nazir Denıs Şmığal Berlinde Ğayrıdan tiklev konferentsiyası çerçivesinde Çoq taraflı donorlarnıñ koordinatsion platforması toplaşuvında bildirdi.
«Ortaqlarımıznıñ destegi tahmin etilgen, ritmik ve stabil olması bizim içün müim. Bizge ğayrıdan tiklev, tış bazarlarğa irişüv ve logistikanıñ eyileşmesi kerek. Bizge tış yatırımlar ve ortaqlarımızdan tehnologiyalarnıñ transferi kerek», – dep yazdı ükümet yolbaşçısı Telegramda.
Şmığal Rusiyeniñ kütleviy atışlarından soñ energetik sektor da ayrı qoltutuvğa muhtac, dep qayd etti.
Ukrayına prezidenti Volodımır Zelenskıy Berlinde Ukrayınanıñ ğayrıdan tiklenüvi konferentsiyasında Kyivge yatırımlarğa ve yardımğa çağırdı. Zelenskıynıñ aytqanına köre, Ukrayına ortaqlarnıñ yarddımınen bu yıl 1 gigavatt gaz generatsiyası ve yaqın yıllarda daa dört gigavatt qurmağa planlaştıra.
Ukrayına baş naziri Denıs Şmığal bildirgenine köre, Rusiyeniñ kütleviy raketa ücümleri neticesinde martta qıdıruv generatsiyasınıñ 80%-ı yoq etildi. Ukrayına energetika nazirligi bildirgenine köre, 2024 senesi martnıñ 22-nden soñ energetik infrastrukturağa qarşı büyük ateşler sebebinden Ukrayına 9 GVt coydı. «Tsentrenergo» devlet şirketiniñ qızdıruv elektrik stantsiyası ve «Ukrgidroenergo» gidroelektrostantsiyası zarar kördi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
