Ukrayina prezidentiniñ ofisi ve Rusiye Mudafaa nazirligi yarım yıl içinde Rusiye ve Ukrayina arasında ilk büyük esir deñişimi aqqında haber ettiler. Moskva, Ukrayinağa istilâda iştirak etken 248 Rusiye arbiy hızmetçisini qaytarğanını bildirdi, Kıyiv ise 230 insannı, şu cümleden altı vatandaşnı qaytarğanını bildirdi.
"Bizimkiler evdeler", - dep yazıla Ukrayina prezidenti Volodımır Zelenskıynıñ telegram kanalında. - Rusiyeden 200-den ziyade askerimiz ve vatandaşımız qaytarıldı. Askerler, çavuşlar, zabitler''. Berilgen malümatqa köre, deñiştirilgenlerniñ bir qısmı 2022 senesi Mariupol mudafaasında iştirak etken edi.
Rusiye Mudafaa nazirliginiñ bildirgenine köre, esirler Birleşken Arap Emirlikleriniñ yardımı ile deñiştirildi. Moskva ve Kıyiv arasında soñki büyük deñişim avgustnıñ 7-nde oldı. Soñra taraflar biri-birini muzakerelerni bozğanında qabaatladı.
Noyabr ayında Ukrayinada insan aqları boyunca BMT Monitoring missiyasınıñ yolbaşçısı Matilda Bogner, missiya Rusiye ve Ukrayina tarafları tarafından yapılğan esirlerniñ işkence ve öldürüv şaatlıqlarını aldı, dep bildirdi. Haber etilgenine köre, Kıyiv Rusiye esirlerine qarşı zorbalıq aqqında bildirüvlerni tahqiq etmek içün cinaiy davalar açtı. Moskvanıñ esabatqa cevabı olmadı.
Kıyivniñ malümatına köre, 2023 senesi noyabr ayına qadar 4337 insan - 3574 arbiy ve 763 vatandaş Rusiye esirliginde buluna. Rusiye akimiyetiniñ vekili oktâbr ayında Ukrayina esirliginde tahminen 500 Rusiye arbiyi olğanını bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
