Ukrayina milliy telükesizlik ve mudafaa şurasınıñ kâtibi Rustem Umerovnıñ Facebookta haber etkenine köre, Türkiye ve Birleşken Arap Emirlikleri aracılığınen Rusiye ile mesleatlar keçirildi, neticede “taraflar İstanbul añlaşmalarını faalleştirmege añlaştı”.
Umerovnıñ bildirgenine köre, muzakereler esirlerni deñişüv esnasını ğayrıdan tiklemeknen bağlı edi.
“Laf 1200 ukrayinalınıñ azat etilüvi aqqında kete”, – dep qayd etti milliy telükesizlik ve mudafaa şurasınıñ kâtibi.
Umerovnıñ aytqanına köre, eñ yaqın vaqıtta tehnik mesleatlar keçecek, tedbir ve teşkiliy meseleler belgilenecek. Umerovnıñ aytqanlarından añlaşıla ki, Ukrayina yılbaş bayramlarından evel deñişüv olacağına ümüt ete.
Noyabrniñ 11-nde Umerov “deñişüv meselesini bloktan çıqarmaq içün” Türkiyege keldi, dep yazdı. Rusiye atarfı mesleatlar ve mündericeleriniñ haberini izaatlamadı. Moskva İstanbulda Ukrayina ile muzakerelerni yañıdan başlatmağa azır, dep bildire.
Baarniñ soñunda ve yazda İstanbulda Ukrayina ve Rusiye eyyetleriniñ bir qaç muzakere raundı oldı. Umerov Ukrayina eyyetiniñ başında edi. Añlaşmalar gumanitar meselelerde tizilgen edi – elâk olğan arbiylerniñ cesedlerini berüv ve esirlerni deñişüv aqqında. O vaqıttan berli bir qaç deñişüv oldı, soñkisi oktâbrniñ 2-nde kerçekleşti.
