Rusiye ve Ukrayına insan aqları vekâletlileri Tatyana Moskalkova ve Dmıtro Lubinets Türkiyede körüştiler.
Subet neticesinde Moskalkova Telegram kanalında Ukrayına ombudsmeninen eki memleketniñ vatandaşlarına gumanitar yardım kösterilüvini muzakere etti, dep yazdı. Başqa bir tafsilât berilmedi.
Lubinets körüşüv daa evel olğan añlaşmalar çerçivesinde oldı, dep bildirdi. Ukrayına ombudsmeniniñ aytqanına köre, taraflar keniş gumanitar meselelerni, hususan rusiyeliler ve ukrayınalılarğa aq qorçalayıcı yardım kösterilüvini muzakere etti.
Lubinets qayd etkenine köre, teklifler aytıldı, amma tafsilâtlarnı vekâletli aydınlatmadı. «Er bir ukrayınalığa yardım etmek içün çalışmağa devam etemiz», – dep aytıla Ukrayına insan aqları vekâletlisiniñ Telegramında.
Lubinets, ombudsmenlerniñ körüşüvinden evel muzakereniñ esas mevzusı arbiyler ve vatandaşlarnıñ vatanğa qaytması olacaq, dep ayttı. Moskalkova keçken yılnıñ soñunda Rusiyege qoltutqanları içün Ukrayına tarafından mesüliyetke çekilgenlernen bağlı meselelerni muzakere etmege ister edi, dep aytqan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
