Ukrayina ve Rusiye 175 ukrayin arbiy hızmetçisini azat etip, esirlerni deñiştirdi, dep bildirdi Ukrayina prezidenti Volodımır Zelenskıy.
"Bugün daa bir kün, Ukrayina öz adamlarını qaytarğan kündir. 175 qorçalayıcımız Rusiye esirliginden azat etildi. Daa 22 qorçalayıcı evlerine deñişimden tış tedbirler neticesinde qayta. Olarnıñ arasında ağır yaralanğanlar ve Rusiye tarafından uydurılğan cinayetler içün taqip etilgen askerler bar. Er keske acele tibbiy ve ruhiy yardım kösterilecek", — dep yazdı Zelenskıy Telegram kanalında.
Ukrayina devletiniñ yolbaşçısınıñ bildirgenine köre, bu "eñ büyük deñişmelerden biri".
"Askerlerimiz, çavuşlarımız ve zabitlerimiz qaytarıla. Azatlığımız içün Silâlı quvetler, Arbiy deñiz quvetleri, Milliy gvardiya, Tış mudafaa quvetleri ve sıñır hızmetleri saflarında küreşken arbiyler. Ukrayinanı çeşit yönelişlerde qorçaladıq — Mariupolde, "Azovstalâda", Donetsk, Lugansk, Herson, Harkiv, Mıkolayiv, Zaporojjâ, Sumı ve Kursk vilâyetlerinde", — dep qayd etti Zelenskıy.
RF Mudafaa nazirligi 175 Rusiye arbiy hızmetçisiniñ qaytarıluvı aqqında bildirdi. "Aynı zamanda 175 arbiy esir teslim etildi, em de yahşı niyet isbatı olaraq acele tibbiy yardımğa muhtac olğan 22 ağır yaralanğan arbiy esir", — dep aytıla Rusiye müessisesi haberinde.
Saban ayınıñ 18-nde ABD ve Rusiye prezidentleri Donald Tramp ve Vladimir Putin esirler deñişimi aqqında laf ettiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
