Çarşenbe künü, yanvarniñ 31-nde, Ukrayina ve Rusiye arasında esirlerni deñiştirdiler, 207 ukrayinalı evge qayttı, dep bildirdi Ukrayina prezidenti Volodımır Zelenskıy öz telegram kanalında.
''Bizimkiler evde. 207 adamımız. Bir şeyge baqmadan qaytaramız. Esirlikte bulunğan er kesni hatırlaymız. Arbiyler ve vatandaşlar. Er kesni qaytarmaq kerek. Bunıñ üzerinde çalışamız", - dep yazdı Ukrayina prezidenti.
Ukrayina prezidenti Ofisiniñ yolbaşçısı Andriy Yermaknıñ aytqanına köre, evge qaytqan ukrayinler arasında Ukrayina Silâlı quvetleri, Milliy gvardiya, Devlet sıñır hızmeti ve Ukrayina Milliy politsiyasınıñ askerleri, serjant ve zabitler bar. Onıñ aytqanına köre, askerler arasında "Azovstal", "Zmiyinıy"da bulunğan ve bir sıra yönelişte cenkleşken Mariupol qoruyıcıları da bar.
Bundan evel Ukrayina Mudafaa nazirliginiñ GUR yolbaşçısı Kırılo Budanov telemarafonı efirinde, onıñ fikirince, esirlerni deñişüv "yaqın vaqıtta olacaq", dep bildirdi. İl-76 uçağınıñ tüşüvi aqqında haberlerden soñ Rusiye Devlet dumasınıñ mudafaa komitetiniñ reisi Andrey Kartapolov ise, şimdi deñişim aqqında laf bile olmamalı, dep bildirdi.
TASS Rusiye devlet haber agentligi Rusiye Mudafaa nazirligine atıf etip, yanvarniñ 24-nde saba il-76 uçağı qazağa oğradı, dep haber etti. Uçaq Rusiye Federatsiyasınıñ Koroçanskiy rayonındaki Yablonovo köyünden 5-6 km uzaqlığında tüşti. Ava gemisinde Belgorod vilâyetine deñişim içün ketirilgen 65 ukrayin esir arbiy hızmetçisi, uçaq ekipajınıñ altı azası ve üç arqadaşçısı bar edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
