Ukrayina ve Rusiye arasında cenk esirleriniñ deñişimi eñ yaqın vaqıtta keçirilecek, dep qayd etti Ukrayina Mudafaa nazirliginiñ Baş istihbarat idaresiniñ reberi Kırılo Budanov ukrayin tele marafonı efirinde.
"Adamlarımıznıñ - asker ya da vatandaşlarımıznıñ - ayatı telüke astında olmamalı. Em de olarnı tutqan şaraitte. Bütün yapıla bilecek şeylerni biz yapacaqmız'', - dep ayttı o.
Ukrayina Mudafaa nazirliginiñ başı, "Ukrayina neticede İl-76 uçağınıñ qazası ve anda arbiy esirlerniñ bulunması adisesinde ne olğanını bilecek", dep bildirdi.
Yanvarniñ 25-nde Ukrayina telükesizlik hızmeti Rusiye İL-76 uçağınıñ Rusiye Federatsiyasınıñ Belgorod vilâyetinde tüşmesi faktı ile cinaiy iş açtı. Azatlıq Radiosına müessiseniñ matbuat hızmeti bildirgeni kibi, taqiqat Ukrayina Ceza qanunnamesiniñ 438 maddesi (cenk qanunlarını ve adetlerini bozuv) ile açılğan. SBU, uçaqnıñ tüşme sebebini ögrenmek içün tedbirlerni keçire. Müessisede ne kibi tedbirler aqqında söz ketkenini aytmadılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
