Ukrayına ve Birleşken Milletler teşkilât Herson vilâyetiniñ işğal etilgen topraqlarında gumanitar yardım köstermek ve insanlarnı tahliye etmek içün gruppalarnı quracaq, dep añlaştılar. Amma Rusiye yol açmalı ve telükesizlik kefaletlerini bermeli.
Ukrayına Tış işler nazirliginiñ matbuat hızmeti bildirgenine köre, bu aqta Ukrayına Tış işler naziri Dmıtro Kuleba ve BM Ukrayına sistemasınıñ koordinatorı Deniz Braun añlaştılar.
Körüşüv neticelerine köre, BM yardım arttırıp, Herson ve zarar körgen vilâyetlerge qoşma quvet yollaycaq.
Bundan ğayrı, BM Zaporijjâ ve Hersonnıñ sol tarafında zarar körgen işğal altındaki topraqlarına gumanitar yardım köstermek ve insanlarnı tahliye etmek içün gruppalarnı acele quracaq, dep añlaşıldı.
Kuleba, Ukrayına Kahovka gidroelektrostantsiyasınıñ patlamasından zarar körgen bütün alanda Birleşken Milletlerge gumanitar tedbir yapa bilmesi içün bütün telükesizlik kefaletlerini bere, dep işandırdı.
Taraflar Rusiye yol açsa ve kefalet berse, BM bölükleri zarar körgen topraqlarğa yol alacaq, dep añlaştı. BM Rusiye böyle imkân berip, kefaletler de berecek, dep bekley.
İyünniñ 6-nda saba Rusiye Herson vilâyetinde Kahovka suv elektrik stantsiyasını patlattı, dep bildirdi Ukrayina arbiyleri. Ukrayına prezidenti ofisiniñ yolbaşçısı Andriy Yermak Kahovka Kahovka suv elektrik stantsiyası bentiniñ bozuluvı Qırımnı içilgen suvsız qaldıra bile, dep bildirdi.
The New York Times neşiri ekspertlerniñ malümatına esaslanıp, Kahovka gidroelektrostantsiyasınıñ bozuluv sebebi içinden patlatuv olğandır, dep yazdı.
Mütehassıslarnıñ aytqanına köre, gidroelektrostantsiyanıñ patlatıluvı vatandaşlarnı telükege oğratıp, Zaporijjâ atom elektrostantsiyasınıñ reaktorlarını suvutuv sisteması içün telüke yarattı.
Ukrayına Fevqulâde vaziyetler devlet hızmetiniñ malümatına köre, iyünniñ 8-i sabasına qadar Herson vilâyetiniñ suv basqan yerlerinden 1995 insan tahliye etildi, 103-ü – bala. 334 kişi qurtarıldı – 15-i bala. İlk malümatqa köre, umumen Dnipronıñ sağ tarafında 20 mesken yer ve 2629 evni suv bastı.
Volodımır Zelenskıy Qızıl Haç ve BM kibi halqara teşkilâtlarnı Kahovka gidroelektrostantsiyasınıñ patlatıluvına tam cevap bermegenleri içün tenqit etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
