BAYKAR şirketi, ukrayinlerniñ para toplağan 3 "Bayraktar" pilotsız uçaqnı bedava berecegini bildirdi. Bunıñ aqqında şirketniñ Twiterde saifesinde yayınlanğan mesajında yazıla.
"BAYKAR şirketi TV2 içün para almaycaq ve Ukrayina cebesine 3 pilotsız uçaqnı bedava yollaycaq. Toplanğan paranı Ukrayina halqınıñ mucadelesine yardım olaraq qullanmañıznı isteymiz. Dayanılmaz kibi körüngen qıyınlıqlar qarşısında bu birdemlik ve azimkârlıq areketinden tesirlendik", - dep yazıla bildirmede.
Evel Sergiy Prıtulanıñ fondu Ukrayin Silâlı Quvetleri içün üç "Bayraktar" içün para toplanmasını ilân etken edi. Bir afta içünde 500 million grıvna toplamaq kerek edi. Bir kün içinde 366 million grıvna toplandı. İyünniñ 24-nde Prıtulanıñ fondu 600 million grıvna tlplanğanını bildirdi. Bu parğa dört pilotsız uçaq satın alınmalı edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
