Rusiye ordusı avgustnıñ 31-nde gece Ukrayinağa X-59 ve 121 darbe uçucısızınen ücüm etti, dep haber ete Ukrayina Silâlı quvetleriniñ Ava küçleriniñ komandanlığı avgustnıñ 31-nde.
Olarnıñ malümatına köre, Rusiye ordusı Qara deñizden raketa uçurdı. Çoqusı reaktiv olğan "Şahed" dronları, "Gerber" ve "Parodiya" taqlitçi dronlar Rusiyedeki Kursk, Orel, Millerovo, Primorsko-Ahtarsktan ve işğal etilgen Donetsk ve Qırımnıñ Sarabuz qasabasından uçurıldı.
"İlk malümatqa köre, saat 08:00-ge qadar ava mudafaası memleketniñ şimali, cenübi, şarqı ve merkezinden Shahed, Gerber ve diger dronlar olğan 96 duşman uçucısızını urdı/bastırdı, idare etilgen X-59 maqsadına irişemedi", – dep aytıla haberde.
Ukrayina Silâlı quvetleriniñ Ava küçleri 11 yerde Rusiye vastalarınıñ ücümini ve sekiz yerde parçalar tüşkenini qayd etti.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.