Rusiye ordusı Ukrayinağa gece altı raketa ve 141 darbe uçucısızınen ücüm etti, dep haber etti Ukrayina Silâlı quvetleriniñ Ava küçleri mayısnıñ 15-nde saba.
Rusiye ordusı Qara deñizden beş H-31P radiolokatsion ile küreş raketasını ve işğal etilgen Qırımdan H-35 gemilerge qarşı raketasını uçurdı. Farqlı uçucısızlar Rusiyedeki Brânsk, Kursk, Orel, Millerovo, Primorsko-Ahtarsk, Ukrayina şarqında işğal etilgen Donetsk, Qırımnıñ Çavda burnu ve Sarabuz qasabasından uçurıldı.
"İlk malümatqa köre, saat 09:00-ğa qadar ava mudafaası memleketniñ cenübi, şimali ve şarqında 1 dane X-35 gemilerge qarşı raketasını ve Shahed, Gerber, Italmas ve "Taqlit" dronı olğan 130 duşman uçucısızını urdı/bastırdı", – dep aytıla haberde.
Daa beş X-31P raketası maqsadına yetmedi, dep qoşa komandanlıq. Arbiyler altı yerde darbe uçucısızınıñ ücümini ve yedi yerde parça tüşkenini qayd etti.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.