Oktâbrniñ 5-ne keçer gecesi Rusiye arbiyleri Ukrayinağa Rusiyeniñ beş yönelişinden ve işğal etilgen Qırımnıñ Sarabuz qasabasından ücüm etti, dep haber ete Ukrayina Silâlı quvetleriniñ Ava küçleri.
"İlk malümatqa köre, saat 08:00-ge qadar ava mudafaası Shahed, Gerber, diger dronlar olğan 172 duşman uçucısızını urdı ya da bastırdı. 13 yerde duşmannıñ ava ücüm vastasınıñ darbesi, üç yerde parçalarnıñ tüşkeni qayd etildi", – dep haber ete Ukrayina arbiyleri.
Rusiye arbiyleri ücümni izaatlamadı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.