Rusiyeniñ gece ücümi vaqtında Ukrayina ava mudafaası 98 uçucısıznı zararsız alğa ketirdi, amma bir raketanı tüşüremedi, dep bildire Ukrayina Silâlı quvetleriniñ Ava küçleri.
Ukrayina arbiyleri 26 yerde 17 darbe uçucısızını, 6 yerde tüşürilgen parçalarnı qayd etti.
Avgustnıñ 5-ne keçer gecesi Rusiye ordusı Kursk ve Rostov vilâyetlerinden Ukrayinağa 4 "Tsirkon"/"Oniks" gemilerge qarşı raketası, Brânsk ve Kursk vilâyetlerinden 24 "İskander-M/S-400" ballistik raketası, Rusiyeniñ üç yönelişinden, işğal etilgen Donetskten ve işğal etilgen Qırımnıñ Sarabuz qasabasından 115 darbe uçucısızınen ücüm etti. Darbeniñ esas yönelişi – Kyiv vilâyeti.
Rusiye ordusı gece Kyiv ve vilâyetine ballistika ve dronlarnen ücüm etti. Soñki malümatqa köre, 15 insan elâk oldı, 26 insan yaralandı. Ücüm aqibetleri Kyivniñ Ğolosiyıvskıy, Obolon, Desnânskıy ve Svâtoşin rayonlarında qayd etildi.
Kyiv vilâyetinde Rusiye ücümi neticesinde 14 insan elâk oldı, 27 kişi yaralandı. Vilâyetniñ arbiy memuriyet malümatına köre, eñ çoq qurban Brovarı rayonında oldı, anda doquz kişi elâk oldı.
"Ukrzaliznıtsâ" sayısını aytmayıp, elâk olğanlar aqqında bildirdi, olarnı Brovarı rayonında "ücüm etilgen logistik merkezlerniñ yanındaki demiryol platformalarında tapqanlar".
Şirket Rusiye ücümi vaqtında tren areketi ve stantsiyalarnıñ işi toqtatıldı, stantsiyalarnıñ hadimleyeri ve yolcular tahliye etildi. Areket başlağanda haber etilecek.
Brovarı, Buça ve Fastiv rayonlarındaki anbarlarda yanğınlar çıqtı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.