Rusiye arbiyleri martnıñ 31-ne keçer gecesi Rusiyeniñ dört yönelişinden ve işğal etilgen Qırımnıñ Sarabuz qasabasından Ukrayinağa 289 darbe uçucısızınen ücüm etti, dep bildirdi Ukrayina Silâlı quvetleriniñ Ava küçleri.
"İlk malümatqa köre, saat 08:00-ge qadar ava mudafaası Shahed, Gerber, Italmas ve diger dronlar olğan 267 duşman uçucısızını urdı/bastırdı", – dep aytıldı haberde.
Ukrayina arbiyleriniñ malümatına köre, 11 yerde 20 darbe uçucısızınıñ ücümi, altı yerde parçalarnıñ tüşkeni qayd etildi.
Rusiye Mudafaa nazirligi ücümni şimdilik izaatlamadı.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.