Martnıñ 8-ne keçer gecesi Rusiye ordusı Ukrayınağa «Şahed» çeşitli 37 uçucısız, ZRK S-300 raketası ve eki X-59 aviatsion raketasınen ücüm etti. Bu aqta Ukrayına Silâlı quvetleriniñ Ava quvetleri haber etti.
33 uçucısız Kirovoğrad, Odesa, Herson, Mıkolayıv ve Harkiv vilâyetlerinde urıp tüşürildi.
Ukrayına cenübiniñ Mudafaa quvetleri komandanlığı bildirgenine köre, Odesa vilâyetinde infrastruktura obyekti zarar kördi, onıñ binaları uzun vaqıt devamında qapalı edi. Yaralanğanlar aqqında malümat yoq.
Çuguyev şeerine qarşı ücüm neticesinde yedi insan yaralandı, hususan bir bala yaralandı, dep haber ete Harkiv vilâyeti prokuraturasınıñ matbuat hızmeti. İlk malümatqa köre, darbe Belgorod vilâyetinden ZRK S-300 raketasından endirildi.
Dnipropetrovsk vilâyetiniñ Nikopol rayonında üç mustaqil ev ve hocalıq inşaatı zarar kördi. Yaralanğanlar yoq, dep bildirdi vilâyetniñ memuriyet yolbaşçısı Sergey Lısak.
Rusiye arbiyleri çeşit silâlardan – dron, raketalar, RSZO - Ukrayına regionlarına muntazam surette ücüm ete.
Moskva, isbat ve şaatlıqlarğa baqmadan, tam cenk başlağanından berli Ukrayınada vatandaşlarğa ateş açılğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
