Ukrayina prezidenti Volodımır Zelenskıy Qırım ve Aqyar sakinlerine muracaat etti. O, Rusiye arbiyleriniñ yarımadada ebediyen olmaycağını, Ukrayina Rusiyege kimseni qaldırmaycağını ve cenkte mıtlaqa ğalebe qazanacağını qayd etti. Muvafıq video devlet başınıñ telegram kanalında yayınlanğan.
"Şimdi Qırımda, Aqyarda, devletimizniñ işğal etilgen er angiy bölgesinde olğan adamlarımızğa muracaat etmege isteyim. Aziz ukrayinalılar! Rusiyeniñ bizim topraqlarımızda olması ebediyen olmağanını epiñiz is etesiz. Men bunı bilem", - dep qayd etti o.
Zelenskıy, Ukrayina topraqlarını ve vatandaşlarını qaytaracaq, dep bildirdi.
"Ukrayina topraqlarını ve adamlarını qaytaracaq. İşğalcilerge kimseni qaldırmamız. Bunıñ içün, cenkniñ işğalcilerniñ mağlübiyeti ile bitmesi içün elimizdekn kelgenini yapamız", - dep ayttı devlet başı.
Oktâbrniñ 24-nde Pragada «Qırım platformasınıñ» ekinci parlament sammiti keçirildi. Ukrayina Yuqarı Radasınıñ spikeri Ruslan Stefançuknıñ aytqanına köre, tedbirde bütün dünyadan tahminen 70 parlament eyyeti iştirak etti. Stefançuknıñ fikirince, Ukrayina suvereniteti ve topraq bütünligi içün bu «küçlü» bir yardım.
Ukrayinanıñ teşebbüsinen teşkil etilgen «Qırım platforması» halqara koordinatsion mehanizm 2021 senesi avgust ayında Kıyivdeki tesis sammitinde başlatıldı. Platformanıñ maqsadı – halqara kün tertibinde Qırımğa diqqatnı saqlap qalmaq, Qırımda insan aqlarını qorumaq, yarımadanıñ işğalden azat etilüvine yardım etmek ve ilâhre.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
