Ukrayina Tış işler nazirligi Orta küzniñ 31-nden Boşnıñ 1-ne qadar Rusiye tarafından ilhaq etilgen Bağçasaraydaki Hansarayda keçirilmesi planlaştırılğan tedbirlerge kesen-kes narazılıq bildirdi, tedbirler "Rusiye İmperiyasınıñ XIX asırdaki areketlerini halq ögünde kösterip, neticede yüz biñlernen Qırımtatarnıñ mecburiy sürgün etilmesine yol açtı". Bu aqta Tış işler nazirliginiñ matbuat hızmeti bildire.
"Rusiye Federatsiyası Qırımtatar halqına, onıñ medeniyetine, tarihiy hatırasına ve dünya medeniy mirasına qarşı sistematik cenkni devam ete. İşğalcilerniñ cinaiy areketleri 2014 senesinden berli vaqtınca işğal etilgen Qırımda UNESCO tarafından keçirilgen monitoring vaqtında qayd etile. Qayd etmeli ki, böyle teşviqat tedbirlerini teşkil etip, Rusiye istilâcıları öz keçmiş ve şimdiki cinayetlerini yalıñız aqlamağa degil de, daa ziyade yükseltmege tırışalar. Tecavuzcı memleketniñ bu kibi sinik areketleri işğal etilgen Bağçasaraydaki Hansaraynıñ "restavratsiyası" devam etkeninen bağlı, bu ise Qırımtatar mimarcılığınıñ abidesiniñ vaziyetini daa beter ete ve bir sıra zarar ketirdi", — haberde qayd etile.
Diplomatlar, Ukrayina bu aqta UNESCO reberligini ve teşkilâtnıñ aza devletlerini resmiy şekilde haberdar etti, dep bildirdi.
"YUNESKO baş müdirini, onıñ mütenasip organlarını ve aza devletlerini, Qırımnı vaqtınca işğal etken Rusiye tarafından tamır Qırımtatar halqınıñ medeniy abidelerini imperiya propagandası ve aqlav aletlerine çevirgen ameliyatnı toqtatmaq içün bütün mevcut halqara aletlerni qullanmağa çağıramız", — haberde aytıla.
Ukrayina Tış işler nazirligi UNESCO-nı işğal etilgen Qırımda Rusiyeniñ areketlerine prinsipial qıymet kesmege ve Ukrayin ve Qırımtatar medeniy mirasını qorçalav halqara mehanizmlerini quvetleştirmege çağırdı.