Ukrayina TİN yolbaşçısı Dmıtro Kuleba, Avropa Parlamentiniñ deputatlarını bu afta bir qarar qabul etip, Rusiye Federatsiyası tarafından Tecavuz cinayetleri içün Mahsus mahkemeniñ meydanğa ketirilmesini desteklemege çağırdı. Bunıñ aqqında o Twitter saifesinde yazdı.
"Rusiyeniñ siyasiy ve arbiy reberligi içün cezasızlıq yoqtır. Olar mesüliyetke çekilmelidir", - dep qayd etti Kuleba.
Daa evel Ukrayina TİN yolbaşçısınıñ birinci muavini Emine Ceppar, Ukrayina BMT Baş Assambleyasında eki qararnı destekleycegini bildirgen edi. Birincisi Barışıq formulasınıñ ömürge keçirilmesi, ekincisi Rusiyeniñ cenk içün mesüliyetke çekilmesi ile bağlıdır.
"Biz bütün mesül devletlerni qararnı desteklemege çağıramız... Bugün yapmamız kerek olğan tamam bu – tecavuznıñ cinayetlerini tahqiq etmek içün mahsus mahkemeniñ meydanğa ketirilmesi", - dep bildirdi o.
Böyle mahkemeniñ meydanğa ketirilmesini Almaniya TİN yolbaşçısı Annalena Berbok destekledi. Amma aynı zamanda, RF tecavuzı içün Gaagada Halqara mahkemede mesüliyetke celp etilemez, dep bildirdi. Çünki mahkeme yalıñız eki tarafnıñ mahkemeniñ azası olğanı ya da dava BMT Telükesizilik Şurası tarafından baqılğan davalarnı baqa bilir.
Rusiye Halqara cinayet mahkemesiniñ azası degil ve onıñ BMT Telükesizlik Şurasında veto aqqı bar. Diplomatnıñ fikrince, Moskvanıñ mesüliyetke çekilmesiniñ yekâne yolu hususiy uquqiy format ola bilir.
Rusiye 2022 senesi fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
